UNTV News and Rescue

Isinusulong sa Kamara ang panukalang batas na magbibigay ng direktang tulong sa mga manggagawa at maliliit na negosyante, na target ipasa sa pamamagitan ng isang special session.

Layunin nitong agad matulungan ang sektor na apektado ng patuloy na hamon sa ekonomiya.

Samantala, hinikayat ng isang kongresista ang Light Rail Management Corporation at Department of Transportation na magpatupad ng 50 percent discount sa pamasahe sa LRT Line 1 upang mabawasan ang gastos ng mga commuter.

‍

Nagpapatuloy ang hakbang ng pamahalaan upang mapauwi ang mga Pilipinong naipit sa kaguluhan sa Gitnang Silangan.

Kaugnay nito, sinimulan na rin ang paglalatag ng mga programa at aktibidad bilang opsyon sa mga repatriate, kabilang ang oportunidad sa trabaho, negosyo, at pagsasanay habang sila ay nasa bansa.

‍

Sisimulan ng Department of Social Welfare and Development (DSWD) sa Miyerkules, April 8, ang payout ng cash relief assistance para sa mga tricycle driver sa mga pangunahing lungsod sa bansa.

Ayon kay DSWD spokesperson Assistant Secretary Irene Dumlao, ilalabas ng ahensya ang detalye sa mga itatalagang payout centers at schedule ng pamamahagi ng ayuda.

‍

Dapat pagtuunan ng pamahalaan ang pagpapahaba ng fuel inventory ng bansa, ayon kay Sen. Sherwin Gatchalian.

Sa halip na magpatupad ng energy lockdown, iginiit ng senador na mas mahalagang tiyakin ang sapat at tuloy-tuloy na supply ng produktong petrolyo sa bansa.

‍

Mariing ipinag-utos ng Department of the Interior and Local Government (DILG) sa Philippine National Police (PNP) ang mas mahigpit na pagpapatupad ng mga lokal na ordinansa sa buong Metro Manila.

Kabilang sa tututukan ang pagbabawal sa inuman sa kalsada at videoke na umaabot hanggang madaling araw, gayundin ang istriktong pagpapatupad ng curfew para sa mga menor de edad.

‍