UNTV News and Rescue

Muling sinuspinde ng Iran ang pagdaan ng mga tanker matapos ang panibagong pag-atake ng Israel sa Lebanon.

Ayon sa mga ulat, bagama’t may ilang barkong pinayagang makatawid, agad na itinigil ang mga susunod na biyahe dahil sa lumalalang sitwasyon sa rehiyon.

Sa kabila ng umiiral na dalawang linggong ceasefire sa Gitnang Silangan, nakaranas muli ng matinding pag-atake ang Lebanon mula sa Israeli Defense Force.

Giit ng Israel, hindi kasama sa tigil putukan ang Hezbollah na inalmahan naman ng iran at nagbantang maaaring mauwi sa panibagong tensyon ang pag-atake.

Nakatakdang magharap sa peace talks ang mga kinatawan ng Iran at Estados Unidos kasama ang Pakistan na tumatayong mediator.

Sa kabila nito, may babala si US President Donald Trump sakaling hindi maging tapat ang Iran sa tigil-putukan.

Inihayag ng Maritime Industry Authority na mayroong apat na Philippine-flagged vessel ang nasa conflict zone sa Middle East.

Gayunman, wala anila sa mga nasabing mga barko ng Pilipinas ang nasa Strait of Hormuz.

Nilinaw ng Department of Migrant Workers na walang ipinatutupad na deployment ban sa Middle East, sa kabila ng tensyong nangyayari sa rehiyon.

Gayunman, patuloy na inaatasan ng ahensya ang mga recruitment agency na imonitor ang kanilang mga naka-deploy na manggagawa.