UNTV News and Rescue

Maaari nang makita ang mga partikular na datos ng government infrastructure projects online.

Ito ang binuksan sa publiko ng pamahalaan sa pamamagitan ng DPWH transparency portal.

Magsisilbi itong digital library para sa higit 247,000 na mga proyekto ng DPWH mula taong 2016, kung saan makikita ang mahahalagang detalye gaya ng implementing office, kabuuang halaga ng proyekto, progress rate, at pinagmulan ng pondo.

Nasa Commissioner-in-Charge na ng Commission on Elections o Comelec ang rekomendasyon matapos ang imbestigasyon kaugnay ng pagtanggap ni Sen. Chiz Escudero ng P30M campaign donation mula sa public contractor na si Lawrence Lubiano noong 2022 elections.

Ayon kay Chairman George Erwin Garcia, kapag naiakyat na sa en banc ang rekomendasyon, ilalabas nila sa Miyerkules, November 26 ang desisyon kung dapat bang kasuhan o hindi si Sen. Chiz pati si Lubiano.

Kinansela ng Pasig City Regional Trial Court ang pasaporte nina dating Presidential Spokesperson Harry Roque at Cassandra Li Ong.

Humaharap ang mga personalidad na ito sa human trafficking case dahil sa umano’y kanilang kaugnayan sa Philippine Offshore Gaming Operator o POGO hub na Lucky South 99 at Whirlwind Corporation.

Maghahain ng mosyon si dating Palace Spokesperson Atty. Harry Roque upang bawiin ng hukuman ang desisyon nito sa pagkansela sa kaniyang pasaporte.

Paliwanag ng dating opisyal, nagkamali ang korte sa desisyon nito.

Iginiit ng Trillion Peso March Movement at Catholic Bishops Conference of the Philippines na wala silang planong pabagsakin ang pamahalaan sa kabila ng planong malawakang protesta sa November 30.

Tiniyak din ng mga ito na hindi sila susuporta sa anomang paggamit ng militar o hakbang na labag sa konstitusyon.